مفتشين بلدية !!
• كتبه جندبي يوم الأربعاء 13 فبراير 2008 الساعة 10:13 ص •السلام عليكم .. !!
بالأمس لما وصلت البيت بعد صلاة العشاء .. ورجعنا من الدوام هلكانين .. اكره شيء عندي ان الاهل يقولون لي روح جيب عشاء .. احس اني ما عاد اقدر اشوف شيء بسبب الارهاق والتعب ويجون هم ويكملونها عليّ بالبيت ..
على طاري الدوام سويت لي احصائية صغيرة بالساعات الاضافية وساعات التأخر بالدوام .. وبصراحة انصدمت من هذه الاحصائية .. فكانت الساعات الاضافية اكثر من 101 ساعة وساعات التاخر اكثر من 5 ساعات .. وللعلم مالي 10 اشهر من يوم اشتغلت بالمؤسسة .. والله يعيننا .. 
نرجع لموضوعنا .. المهم كان للوالدة وخواتي طلبات خاصة بالعشاء وهذا اللي زاد الطين بلة .. وياليت من زين الطلب .. طالبين تميس وفول وعدس وكبده ومطبق .. 
فرحت لاقرب محل وهو فوال بشارع الضغط العالي وهو محل كبير ومعروف .. دخلت وطلبت الطلبات .. وجلست انتظر لما يخلصون .. والمطعم كان مليان بالناس ناس تتعشى وناس تتنتظر عشاها وناس طالبه مثلي ..
شوي دخل علينا اثنين سعوديين ومعاهم كيس فيه اكل .. وراحوا يفتشون اللي يسوي المطبق ويطالعون في اغراضه ويسالونه متى جاء هالعجين ومتى سويت هالبيض .. ما حصلوا شيء عنده .. راحوا عند اللي يسوي الخبز والتميس و جالسين ما نسمع الا صراخ .. طبعا في هالوقت الناس اللي بالمطعم كلهم متعجبين من الموقف .. جاء مدير المطعم وقال لهم خير من انتم قالوا حنا مفتشين من البلدية وعليكم شكوى كبيييييييييييييييييييييييييييييييييرة << ترى كانوا يقولون كذا 
ويقولون فيه واحد مشتكي عليك وهذا هو واقف على الباب .. كل الناس بدأت تطالع على الباب والا هذا واحد واقف عند الباب ومتلثم بشال اسود ومو واضح الا عيونه .. بصراحة انا شكيت بالامر واحد جاي يشتكي ومتلثم .. اللي يشتكي بيكون معاه الحق مو مشتكي ظلم ويخبي وجه عن الناس ..
المهم كان في اخذ وعطاء وشد وجيب تصريح المحل وتصريح البلدية ودفتر السجلات والاقامات والبطاقات الصحية .. فطلع فيه عامل ما عنده بطاقة صحية ومسكين بغى يموت من الخوف ..
نسيت اقول لكم ان اللي يشتغلون بالمطعم كلهم من اليمن ..
المهم ان المفتشين ما حصلوا شيء واضح وقوي علشان يقفلون المحل .. طلعوا المفتشين من المحل وهم يقولون لمدير المطعم خل صاحب المطعم وكفيلك يمرون علينا بالبلدية .. طبعاً هالكلام تقريباً الساعة 9 وربع بالليل امس ..
رجع الوضع بالمطعم زي ماهو عليه .. وشوي فجأة الا ويرجع واحد من المفتشين .. ويروح لمدير المطعم وامام اللي موجودين كلهم .. ويقول لليمني .. اياني واياك لو انت او واحد من عمالك يروح يشتكي علينا .. تصدقون يهدده بهالصيغة !! انا وكل الموجودين انصدمنا من الكلام ..
جيت انا وتكلمت قلت له وش هالكلام انت وجاي وحايس المحل عليهم وبالاخير تهددهم انهم ما يشتكون .. قال لي مالك دخل .. قاموا زباين المحل يدافعون عن المحل وعني
.. بعد ما شاف ان الوضع ما عاد يخارجه قام انسحب من المحل وطلع .. انا اخذت عشاي وطلعت وراه والا اشوفهم راكبين سيارة وحده ، الاخ المشتكي والمفتشين مو راكبين سيارة بلدية ولا شيء واللي يسوق بهم الاخ المشتكي .. وقاعدين يضحكون ..
انا بكل صدق تعجبت وانقهرت من اللي حصل .. يعني على عيني وعلى راسي تعال وفتش المحل بل بالعكس فرحت لما شفتهم دخلوا وقاعدين يفتشون .. تحس فيه زيارات وتفتيش واهتمام من البلدية .. لكن تصرفه الاخير جدا جدا سيئ وخرب عليه كل شيء ..
بس انا متوقع ان زياراتهم مو تابعه للبلدية وان لهم مقاصد اخرى من هالزيارة .. والعلم عند الله .. !!
مصنف تحت جندبي Day
التعليقات : 20 | زوّار الموضوع : 2,097 |
طباعة التدوينة
| 
إرسال التدوينة
• نسخة الجوال • الرابط الثابت • اكتب تعليق » •
مفتشين بلدية !! |
Powered by FireStats
وعليكم السلام ورحمة الله وبركاته
مو بعيدة يكون مقلب ( حسد ) من صاحب مطعم منافس<<< والله أعلم هذا شي
الشي الثاني وهو أمر مؤسف وإن كان ليس الكل كذلك إلا إنه يوجد وهو أن الموظف السعودي
مرات تأخذه العزة بالاثم ويشوف نفسه على العامل الاجنبي <<< أقصد من غير السعوديين
في أمان الله
هلا بمها ..
انا اتوقع ان الشيء الاول اللي ذكرتيه هو الصحيح ..
وعليكم السلام ورحمة الله وبركاته
اولا جزاك الله خير على تصرفك معهم،
والله يبارك فيك على وقفتك مع هالناس،
ثانياانا من كل الي ذكرته حسيت انهم مو مفتشين بلدية صدق،
بس يشوهون سمعة المحل ،
او مقلب لانهم كانوا يضحكون..
عموما الحركة كانت بايخة وحرام يستقون على الفقارى
والعمالة الوافدة ،
احيي فيك شهامتك،
اشكرك لنقلك للموقف..
أيوااااااااا
المحل اللي تتكلم عنه في الضغط العالي..
امممممم
ويمدحونه و مشهور..
بعد تفكير و رويه،،
حسيت أنه الجره الذهبيه أو بجنبه أو أسم قريب من ذلك،،
الله يا زين الفول..
وهـ يا حبي له،،
يمكن يوسعون عن صدورهم
والحين هم اي احد يقول لهم انا من البلدية علطول يسون تفتيش :noworry:
مافي اشوف بطاقتك تصريح من البلدية لازن نفتش كيذا يعني علطول :unsure:
وربي يعيينك ع عملك ويخليك لاهلك
شكلهم مشتهين يستهبلون وحطوها بهالضعوف :noworry: …
طيب وين اثباتهم حقين البلديه ؟ كل من جا يقعد يحوس المطعم من غير اثبات؟؟
مدونتك رائعه ..
عادي .. الفضوة عند مثل هؤلاء تسوي أكثر من كده
واضح انهم نصابين ..
اما حركة يا ويلك تشتكي
يضحكونك الناس اللي ماخذه مقلب في نفسها ..
من جد ناس فاضيه
حسبي الله ونعم الوكيل
هلا ….
هم عندهم بطاقات ووروها العمال .. بس بعض من تصرفاتهم مو زينة وهذا اللي رفع ضغطي
فلانه
ماشاء الله عليك 
هلا بليان وشرفتي المدونة
هم عندهم بطاقات ووروها العمال .. بس زي ما قلت تصرفات البعض ما كانت حلوة
والله يعين الجميع
هلا بـ Photon ..
نورتي المدونة ..
الاثباتات كانت معهم ..
والاروع مرورك وردك في المدونة ..
هههههه
صدقت اراك لاحقاً ..
faith ..
ههههههه .. المشكلة شايفين نفسهم بس بعد ما شافوا الناس تتكلم عليهم طلعوا ووجه الواحد منهم كأنه مضروب بجزمة وانتي بكرامة :lol:
حلمي معي ..
فاضية وبقوة .. اجل تفتيش الساعة 9 ونص بالليل
حركه حلوه
ما شاء الله
يدل على الرقي الأخلاقي
وينم عن شسمه هذاك
الله يخلف على أم(ن) جابتهم
مشكله يعاني منها الشعب السعودي
فيما بينه بالأصل وبعدين بين الشعوب الأخرى
الفوقيه ألي ما له داعي
يعني وخير يا طير وإذا كنت سعودي
يا ما هنود أزين منكم :p
بس الله يرحم الحال والمدري شنهو
وأنا أحس أنو كلام مها صح :noworry:
الظاهر انهم جد من البلدية بس مشتهين يسوون مقلب
استغفر الله بس
أسمى .. ههههههههههههههههههههههههههه
والله اني فطست ضحك على >> الله يخلف على ام(ن) جابتهم
تسلمين على مرورك
هلأ هذوو ..
مو مقلب .. لكن الله يرحم ام(ن) جابتهم