[ واجب ] ذكريات من الماضي :D
• كتبه جندبي يوم الأحد 6 سبتمبر 2009 الساعة 7:07 م •حوّلت لي الحجة ( أسماء ) واجب تدويني عن أيام أول .. أيام الطفولة والصبا >> الله أكبر يالشايب ، وطلبت إننا نرفق صورة قديمة لهذه الطفولة الغابرة وأنا انحست وعفست البيت وأزعجت أهلي حتى حصلت على الصورة .. يمكن الذكريات بدأت تتلاشى بحكم المشاغل والهموم والضغوط في هالأيام لكن اللي باتذكره الحين باكتبه وأنا متاكد إني لو أمخمخ شوي باطلع الفضايح الصدق .. وهي الله يهديها بكذا بتجبرني إني أرجع شوي للوراء وأحل الواجبين اللي باقي موجودين عندي في المسودات لحلمي معي وأرطبون 
^
^
اذكروا الله >> كم أنا حلو من وأنا صغنطوط 
- أتذكر سيارتنا الكشخة اللي ما كان لها مثيل لونها أسود وأظن كان اسمها ( 240 L ) أبوك يالاسم ، واللي مخليها كشخة أنها كانت تتكلم وحنّا كنّا في حالة صدمة وشلون السيارات كانت تتكلم !! .. كان إذا فيه باب مفتوح يطلع صوت حرمه تقول ( انتبه .. الباب الأيمن مفتوح ) .. وكذا على كل الأبواب
- أتذكر أول ما وصلت ( الدشوش ) وكان أول من يركبّها جارنا في العمارة اللي جنبنا كان طيار يشتغل في الخطوط السعودية وكان دش ( خيالي وكبييير جداً ) من النوع اللي يتحرك أتوماتيك من الريموت يعني ما يحتاج يجيب عامل ويجلس يحرك فيه علشان يلقط الإشارة ولاهو زينا مركبين ( أريل ) من العصر الحجري وكان يطلع فيه البحرين وكنّا متشققين ومشكلة كبيرة لمّا تخرب الساعة اللي تدوّر الأريل ، وبعد ما ركبه وخلص تجمعنا أنا وأخوي وولد جارنا وجمعنا كل ( النعول ) اللي في العمارة وسوينا مسابقة مين أكثر واحد يدخل ( النعول ) في صحن الدش الكبير ، وزعنا النعول بالتساوي وجبنا لنا ( بلوكات ) حتى نقدر نلحق فوق السور حق السطح .. وبسم الله بدأت المسابقة وهاتك يا حذف .. بعضها تصيب وبعضها تخيب ولما خلصنا نزلنا وما كأن فيه شيء صار ، وبعد يومين أكلنا علقة على مستوى كبير لأن أهل البيت ما عاد عندهم نعول يلبسونها والرجال صاحب الدش أشتكى علينا
- أتذكر حادثتين محزنتين .. هوشة في الحارة عندنا .. انطعن فيها أحد الأشخاص أمامي وكانت أول مرة تمر عليّ حالة طعن ، والحادثة الثانية حادثة دهس أمام مدرستنا الابتدائية راح ضحيتها طالب
- أتذكر أيام الأمطار اللي كانت تهطل على الدمام وكنّا نطلع بالسياكل وما نرجع إلاّ والواحد مننا ظهره صاير أسود من الوصاخة اللي بالشوارع
- أتذكر في صلاة الظهر في الابتدائية كان يصلي فينا مدرس الدين ولما سجد .. طوّل ما رفع من السجود .. فلما تأخر رفع واحد من الطلاب راسه يطالع المدرس وش بلاه تأخر ، طلع المدرس واقفه على راسه حمامه
- أتذكر يوم كنت بجماعة النظام في المتوسطه .. كنّا نطلع من المدرسة أوقات الفسحه نفطر ونرجع وما حد درى عنّا >> حاميها حراميها
- أتذكر مرة في أحد الصفوف وكنت جالس قبل الأخير .. وفي نص الحصة .. شوي إلاّ كرسيي يتحرك وبقوة .. التفت على اللي وراي ما حصلته على الكرسي قلت بسم الله وين راح الرجال دوبه وراي شوي إلا يهز مرة ثانية طالعت وراء ما فيه أحد طالعت تحت الكرسي حقي إلا أشوف سيقان خويي أثر خويي تشنج وطاح وطلع عنده صرع مسكين
- أتذكر مرة رجعت للبيت من المدرسة مشي وكنت نص المسافة حافي لأن نعولي انقطعت وكانت المسافة بعيدة مرة يمكن في حدود 3 كيلو
- أتذكر أول مرة انضرب فيها بحياتي في المدرسة يوم كنت بصف سادس ابتدائي وانضرب الفصل كله بسبب طالب تكلم على مدرس وما رضى الفصل يعلم مين اللي تكلم ، وكنت أنا آخر واحد انضرب ومن حرة المدرس كسر المسطره الخشب على يدي
هذا غيض من فيض ..
والواجب أحوله لمن أحبّ حله إلى : إيمان ( فيميل ) ، ياسمين ( جاز ) ، ( مضيعة بيتهم ) ، أسماء ( حلمي معي ) ، بدر الشايع ، ياسر الغسلان ، ظاهر الحربي ، فرح ، أحمد الشمراني ( خاطرة بيضاء )
بس لا تنسون صوركم وأنتم صغار .. 
مصنف تحت جندبي Day
التعليقات : 25 | زوّار الموضوع : 2,080 |
طباعة التدوينة
| 
إرسال التدوينة
• نسخة الجوال • الرابط الثابت • اكتب تعليق » •
[ واجب ] ذكريات من الماضي :D |
Powered by FireStats
هههههههههه
يا نااسو ع الواجب الفله .. والله الذكريات جميله جدا جدا .. بس شايفتك ما اخترت الا المواقف الشديده تقريبا ً
و كلووو كوووووم و الحمامه كووووووم ثاني
بانتظار باقي الواجبات .. و متحمسه اشوف اجابات الباقيين
ما فيه أجمل من الذكريـات
.. والله يعين على البحث عن صور 
..
ثاني واحد من اليسار شررررررررررر
ضحكتنا الله يحفظك
هههههههه يخوي ذكرتني بالذي مضى
يوم أشوف اسمي بين الممر لهم
ويا إن صار وجهي مثل الأخ
ولا يهمك نحله ونحط من الصور المخيفة حقت الطفولة خخخخخ
بس سؤال.. ليش اغلب ذكريات العيال فيها لعب بنعال ؟؟ ما عندكم غيره؟ ههههههه
ياعيني على الـ240 L زمان يافن كانت مثل الكامري قراندي
من ذكرياتك وين الجنادرية عنك
ذكريات ولد مؤدب
احم لا تدري عني بس
وبعدين ليش التفضيح بالاسامي
اسماء وياسمين و بثينه
ههههههههههههه ذكرياتك كلها ضرب و مضروب
>>> ولد يختي اش تتوقعي 
والا حركتكم لما كنتوا في النظام 
ياهي كانت أيام تحس نفسك قبضاي ومالي الدنيا وكأن خلاص باقي شوية وتسير مدرس لو سرت في النظام خخخخخ
أحلى شي اللعب تحت المطر واللي يسير بعده! طبعا هنا المطر مو كويس لما تلعب تحته بسبب الغازات والمصانع فبيجيب الصداع و السخونة من السموم اللي في الجو
و زي ماقلت لك في تويتر خخخ حكاية الستالايت شيييييييييييي
[...] اخوي با الله رائد محمد الزهراني ” جندبي ” [...]
وين تعليقي
أنا يسوي تعليق هنا
المهم كنت أقول ثاني صورة من اليسار آكه
طالع الولد الذي مؤدب
كنت في النظام أجل
قسمن توقعتك الولد الذي مؤدب 
ثانكيو ع التمريرة بو محمد
ثاني صورة لك شي بريء مرة
ننتظر ذكريات البقية
[...] واجب تدويني ممرر من الأخ العزيز رائد (جندبي) [...]
ههههههههههههه اممممممممما الحمامة ما توقعت
حتى انتو حركة الفصل ما يعلموا على صاحبهم والكل ينضرب ياااه
ذكريات حلوة كثير
غريبة ذكريات الطفولة تبقى في الذاكرة وكانها اليوم ..
اما سالفة رجعت البيت باقي المسافة من غير جزمة
ذكرتني بسالفة ( احم احم )
بخصوص احل الواجب لا مو حالته
، لاننا بطلنا نحل واجبات 
بس هذا الواجب انا حاله واحد زية عام 2007
لما كانت مدونتي في البلوق سبوت قبل لا انقل للورد برس ولين دومين خاص ..
وهذا رابط الحل
http://www.mblog.ws/?p=259
اعتقد انه نفس الفكرة تقريباً >> لاتقول لا مو نفس الفكرة
طيب كم عطوك علامة على هالحال النموذجي
حلوه الذكريات ونعيش عليها
تحياتي لك
ههههههههه ضحكت على سالفة الحمامة و سالفة خويك اللي فيه صرع
الله يشفيه بس اسلوبك هو المضحك كل هالهزة اللي تحتك ما انتبهت لها
ماشاء الله تبارك الرحمن صورك و انت صغير كلها براءة
موفق يا رب
طلاب فصلك محدودين !!!!
يعني الواجب مو عام ، حلووووو ..
خخخخخخخخخ ..
مأجمل الذكريات وما أروع تجارب الطفولة
والذكريات الجميلة تبقى محفورة في النفس على مر الزمان
وفقك الله اخي الكريم
دمتم بحفظ الرحمن
ما أجمل الذكريات
.. وخاصة الجميلة منها 
دمتــ الجندبي …
تحيتي ..
الصورة الثانية ع اليمين ( مؤدب ) هههههههه
اما المواقف توحفة .. أضحك شي سالفة الدشوش ^_^
حلوة أيام زمان
[...] من رائد .. [...]
:
ايش هذه الخشة التي هي كذا يعني فتنة
الطفولة حلوة والله وحكاوك فلّة
[...] ممر لي من الأستاذ رائد.. [...]
آها اجل كنت تتشفق عالبحرين
ذكريات جميله
كل سنه وانت طيب
اتذكر مره هربنا من المدرسه انا ولد خالتي بعد الفسحه طبينا من الطاقه من الدور الأول وطحت عليه فبطنه واسبوع واهو يراجع المستشفى
[...] اخوي المدون رائد محمد الزهراني ” جندبي “ [...]